عريس في المصيده والعروسه صياده

وعريس في المصيده الحلقه الأولى (قبل الدخله)

الواد عندنا متهم إنو مدلع وطلباته مجابه في البيت يطلع على كيفه والبنت دايما حاسدته على الحريه ولكن الحياه الورديه تنتهي من يوم ما يخطب لأنه يبدأ ياكل ويتطلطش إلين تفوز البنت عليه بالضربه القاضيه ....
فأول ماالغلبان يشم نسمه ويتوظف تجيبه أمه ولا أبوه وتقوله ....ولا يمكن المجنون يقولها.... ياماما أبغى أتجوز (يعني أتنكب)

الأم على بالها حتجيبله واحده تساعده وتنتبهله وتجبلها أحفاد وتزغرد وتنبسط وتبدأ اللغوصه ....والدنيا كلها تعرف ويبدؤو يدوروله على بنت الحلال....

طبعا الرجال عندنا إذا يبغى يشتري سياره يجيب مجله ويسأل على المواصفات ويروح المعرض ويشوف السياره ويسأل أصحابه كيف الصيانه ويقارن قبل مايحط فلوسه والعلاقه 5 إل 7 سنين بالكتير وياخد شهور عشان يقرر.....

أما في الحياه الزوجيه اللي تستمر 40 سنه فماما تشوفله واحده في فرح تعجبها لأنها شكلها طيب ومكن يومتها عندها مغص عشان كده أترزعت في الكرسي وسؤال لفتو وتلفون لمعتوقه والكل يمدح في البنت وأخلاقها وهما يدروا هي إيش بس عارفين أمها وأكيد البنت زيها ويالله هييه جري على بيت العروسه...

وتجي الشوفه الأبو مفرصع والأم تشوف بنص عين والبنت مكسوفه والولد مكسوف وتحت ضغط نفسي وحاسس بالزنب إنو شاف البنت ويحس إنو لازم يستر عليها ويتجوزها؟؟؟ ولو فكر يقول لإمه ما عجبتني تشمق له أول مره ، وتاني مره تديله كلمه فعضمه ، وتالت مره تقول له أبش ياولدي هما بنات الناس لعبه ترى أنا تعبت شكلك لعاب؟؟ .....

ويروح الواد إلي عمره عمر الورد ومافي خبره ويحس بالزنب( إيش قله الأدب دي) ، والمره الرابعه العروسه الجنيه تبان له حلوه وأخلاقها عسل وخجوله والطير اللي في السما يقول العمى وهو ينقز وتتم الخطوبه وتبدأ رحله الفلس علب الملكه المهر الشبكه الصاله المغنيه المقينه الفستان الهدايا فواتير الجوال والأبو يدفع والأم تدفع والرواتب تروح والواد يضحك زي البله على الجوازه اللقطه والبنت الغلبانه تضحك بس في قلبها لأنو ما غلبان إلا العريس وأمه وتبدأ الدلع الورد الهدايا أبا أزور أمي كل يوم أبغا أسكن جنبها ، أبغا شهر عسل في النمسا زي فلانه ، أبغا فرح في صاله ليلتي زي علانه ، أبا عفش من رو بوبو (بوبو مين؟؟؟)

نبغى المفارش من مدري فين والعريس يكع وأمه تكع وأبوه يكع وكله في سبيل السعاده والإستقرار والحلال يهون

طبعا معسكر العروسه وخالاتها عاملين إجتماعات يوميه في غرفه العمليات لهدف واحد:
" مص العريس إلين يفرفر وعمره مايشرد ويقدر قيمتها"
(ماني فاهم يعني مايقدر قيمتك إلا بخراب البيوت) ونتائج المؤتمرات تترجم لطلبات في تلفون الليل بدلع وغنج والله حاهنيك وحسويلك عصير وأكبسك (عمره واحد كبسته مرته أكثر من مرتين طول عمره) هها هها العريس العبيط يضحك ويكع ويكع كعا كعا والعداد يقول إنو أستلف دخله لمده عشر سنين وتحويشه عمر أمه الغلبانه أللي حبت العروصه يوم ماجاها مغص في داك الفرح وما شافتها يوم ماقامت ترقص بالفستان المفتوح زي هيفا بعدها باسبوع وتدخن مع صاحبتها في الحمام

شفتوا كيف دخل القفص بسهوله والأبوا سأل على الأب والام على الام محد داري عن البنت أيش شخصيتها ولا أخلاقها ولا أيش بتهبب مع صاحباتها والواد عمره 22 عشرين و6 شهور خطوبه وما فهم شي لأنه صغير والبنت لفته على أصباعها بضحكتين وبكوتين (على فكره علميا البنت مخها يكبر قبل الواد فعمرها 18 بس يعادل 28 عند الرجال يعني عريسنا عمره 12 سنه بناتي)

وجات ليله الفرح ودبسوا الغلبان في فلوس المطربه الغاليه والأم أستحت تتضارب وتسوي غجرنه على الكوشه وإيش حكايه المصوره والشو هادا إلي يورو فيها صوره ولدي( بمخاطينه) يعني وهوو صغير تقول ماشالله سيره عالم ذره يعني ولد كان يجري حفيان في الحاره نحط صوره ببروجكتر ليه ؟؟؟؟؟؟ والبنت ماشالله كانت تدرس باليه؟ هي مره واحده وبعدين رجعت تحري حفيانه في الحوش!!!

يالله خلي المصوره اللبنانيه تتمكسب لا والزفه لازم زي ديانا ، ياغجر أنتو دارين إنو هادي موسيقى كنيسه وديانا ماتت؟؟
وأيش حكايه علب اللبان الغاليه دي؟
وكرت الفرح ب 50 ريال ليش حيتخلد فمتحف برلين وكع ياغلبان....

وأخونا العريس فاشخ ضبه في الكوشه مستني اللحظه اللي صبر فيها على الهم هادا كله بسببها ولا فارقه معا المغنيه ولا الصاحبات ولا الفستان الغالي اللي حيترميي (مو حرام 30 ألف ليله واحده مسكين يابويه راتب شهرين في الوزاره أيام عزك)

وأم العروسه تبغى ورد ليلكي !!!، أيش فهم أختك في الليلك وانتي أصلا ما تعرفي غير داك الورد اللي يندر مويه بيضه وكانوا ياكلوه الحمير ماجيتي تنضفي إلا على ضهري ؟؟؟

وآآآه مسكينه يأمي متحمله متاقت حماتي عشان خاطري وفلسفتها عن الشنط قديش رخيصه فباريس آآه يامصاريني فلوسي بتنحرق وقال إيه هيطردوني من الكوشه عشان تتصور مع صاحباتها فلوسي وأنا ما أقعد ففرحي غير ربع ساعه وعشان خالتها عقد حتى أبويا ما حيشوفني عريس وكلكم ياعجر قاعدين تضحكو وتتفلسفو بفلوسي

يللا كلو في سبيل الحلال يهون.....

عموما العريس الغلبان قعد في الربع الساعه اللي دفع فيها نص مليون حاطط عينه في الأرض عشان لايقولوا عينه طويله ويطالع في عروسته اللي حتهنهنه وتعوضه ايام الحرمان ياسلام اخير حادخل النخيل لوحدي مع مرتي واتفل في وش الأمن واروح مطاعم واذا جري ورايا مطوع اندرله من السياره وبطاقه العيله فجيبي( او معلقها على ضهري لآنها كبيره قد التميسه) واخيرا اقدر اتدلع واتكبس والاقي قمر مستنيني في البيت بقميص النوم وحنعيش حب وسلام واخيرا راح اطلق الهجوله في الشوارع مع الشباب والاقي توأم روحي .....
وفجأه سمع زعقه .....
.لا صرخه......
لا صوت بومه........
ولا صوت الشاحره الشريره ...
.لا طلع صوت الزفيفه التكرونيه بسنونها الحلوين اللي نصها اتكسر من الفوفل بتصلي على النبي عشان تزفه وهادي الزفيفه اخدها "بكج" مع المطربه أم خمسين الف اللي ام العروسه قالت أنو مالقت غيرها وقالتلهم لو مادفعتوا مافي تسليم لا يامي نسلم يعني معقول مافي زفه ...

وانزف والعروسه تضحك من قلبها مره عشانها سوت ليله العمر (انا ماني فاهم ليه ليله العمر هي لاعب كوره ولازم ينهب في مباراه اعتزاله عشان ماحيلعب تاني نقوم نعوضه)
...ومره عشانه مشى كل اللي فراصها وراص امها العفن
ومره عشنها صادت عريس اخضر قالت عليه صاحبتها بيري (هادي الآسامي الجديده اللي طالعه وكانها اسامي كريمات) انو حتقدر تخليه ينفذلها كل طلباتها وبيري هادي بنت عمرها تلاتين سنه مفلوته ومعجونه بمويه عفاريت وتسافر لوحدها وهي اللي علمتها تدخن سيجار لآنه موضه ومره عشان العريس شكله ميت فدباديبها

أما عريسنا العبطبط بيضحك عشانه اتجوز وهو ماهو فاهم الورطه اللي دخل فيها ، لانه الحرمه قبل الجواز غير بعد الجواز خلونا نقول قبل الجواز صياده تكون انثى وحنونه وبكايه ودلوعه وغلبااااااانه وهادي لآنه ربنا خلقها صياده (زي اللبوه مرت اللأسد) تحوم حول الفريسه وتستخدم كل حيل الطبيعه عشان الفريسه توقع في الفخ واذا وقع تغرز مخالبها فيه عشان مايفرفص وتاخده للعرين عشان تمرمشه ....

وكدا صاحبتنا بالنسبه ليها دفوف الزفه هي طبول الحرب والزفيفه هم القبيله البدائيه وهي اللبوه ( بصراحه امها لبوه وستين لبوه)
والعريس هو الفريسه والفرح هو المصيده وبيت الزوجيه هو العرين وتلاقيها متوتره من شي واحد انو امها تفرد الملايه لأم العريس وتفركش الجوازه زي صاحبتها رها (بالله هادا اسم ، قلبي لعب) لآنه الواد طايح على راصه وخلاص دخل القفص

ومشي العريس" صجو" مع عروسته الكتكوته المفترسه عشان يفتحو البوفيه / وما ادراك ما البوفيه........

في واحده من اجتماعات غرفه العمليات قعدوا ينقوا المنيو والعريس قاعد وكلو يفتي الخاله وبنت الخاله وجوز الخاله والأبو (مو لاعب الكوره السله واحد تاني وما نقص غير هو يفتي) وعمنا قاعد مستحي يقولهم المنيو هادا ابو 450 نهبه وليش ناكل الناس استكوزا وليش صواني الخرفان مدهب وليش ليلتي من اساسه (موضوع ليلتي كان حيفك الملكه على فكره) ويفتكر انو راح لأبوه وكان ابوه راح يتجنن وصار ينطنط زي كوره الباسكت وانو امه بعدين نزلت السعر ل 300 واكلت تشميق من معسكر الغجر وراضت ابوه بعدين ، طبعا هو فرحان وفنفس الوقت ماقدر يمسك نفسه عشان يشوف ال 150,000 راحت في ايت اكل /
وفجأه ...
سمع صوت الغنوجه" يللا نقطع الكيكه (كان على فكره مسميها شي تاني لمن عرف سعرها والفرق حرف واحد) يابودي" .....

ياسلام انا بودي الله يرحم ايام ايسكريم الحجاز فجرول طبعا نسي همه واستعد للحركه البهلوانيه اللي صممتها حماته الله يحرقها......
"تقطع الكيكه بالسكينه كل الادوار من فوق لتحت / وبعدين تاكل العروسه وصله من غير ماتوصخ الفستان ومن غير ما تقطع وصله كبيره تخلي العروصه تبان مشلومه في الصوره..." وافتكر يومتها انو خطر على باله لو ان السكينه تتزحلق وتدخل في حلقها بس بعدين اتعوذ من ابليس

وبعدين...

طردوا المسكين عشان القرده تتصور مع صاحباتها توتي وفوفي وموتي ورها وشها ومها وهلين وميرين وبقيه العفاريت اللي مسميين نفسهم الوندر قيرلز...ويفتكرانو لمن قلها انتو عصابه زعلت وقالتلو بطل تخلف خليك كوول....يالله لمن نشوف اخرت الكوول معاكي افكار كتيره مرت فراصه ولكن كل مايفتكر الدخله ينعمي وريقه يسيل الهبلووه كانه الجواز مايسير الآ على طريقه الكوول

واخير سمع صوت امه يالله ياحبيبي عشان تاخد عروصتك على الفندق جات السياره الطويله...طبعا السياره الطويل هي الليمو ولمن قالتلو ابغى ليموزين توديني الفندق يفتكر انو قالها مقامك اكبر من كده وفرحت ...وزهمت امها....وخالتها المفرعنه....وابوها.....واخوها ال....(عيب بس اخوها مره فافي والواد ماطاقو خصوصا انو عامل شعره دنب حصان ولمن قالها دنب فار لآنه شعره اكرت زعلت) وقالتلهم:....

شوفو بودي يبغى يجيبلي احسن من الليموزين حق الأوسكار ...ياترى يابودي تبغى تركبني ايش هيليكوبتر؟ داد هو بيسمحو للهيلكوبتر في جده وعمو عبدالله يقدر يتصرف؟؟
طبعا صجو شخ في سرواله أوسكار ايه؟؟؟؟؟؟؟؟؟؟؟؟؟؟؟ انا دحين مابغى اركبك تاكسي وكنت حيالله ابغى اجيب الأزنوبيل حق عمي تقولو ليا اوسكار وهيليكوبتر....بالله اتخيلو صجوا في الصالون وعيله القرود حوالينوا بيرتبو للهيليكوبتر على حسابه وما رحمه غير انو انكل عبدالله قالهم ممنوع نطير هيليكوبتر إلا اذا الفرح فرابغ .....طبعا العروسه ندرت برطم الدلع( وهادا قصه لوحده) والحلو أنو دبسهم جميله بس التمن كان 5000 ريال فتوصيله 10 دقايق من ليلتي للهيلتون....لآنه بعد الهيلكوبتر ماقدر يقولهم انو فهم غلط وهادي دفع فيها نص آخر راتب بقيله

وشاف امه دمعت واتمنى فديك اللحظه ينكفي ويبوس رجلها لولا انو الغجر محاصرينه وركب السياره وبكده (استنوا مو في طراطيع بس بركه هادي اتبرعبها عضو شرف من عيلتهم)
وبكده دخل العريس القفص في وسط تصفيق قبائل عيله العروصه المتوحشه وجنبه اللبوه تبتسم ابتسامه النصر وواحد صفر ياعريس الغفله

وإلى اللقاء
منقول

مشكوره بس انت ليش تبغي تكرهي الناس بالزواج
الزواج مافي احلى منه

هههههههههههههه

مشكورة حياتوا

مثل ماقال ولد ملوك ليش تبين تكرهين الناس بالزواج

بس ما في احلى منه والله ما اعرف لأني ما جربت

عقبال ماتجربي اممممم الزواج مو وحش بس اللقصه حلوه وعجبتني لا اكثر يسلموو عالمرور ويسلموو ولد الملوك

يعطيكي العافيه

والزواج حلو للي يبغاه يصير حلو

والدنيا حلوه للي باله واسع

وفي الأخير هم رفقاء درب

وأسلو واحد مجرب

تقبلي مروري أبو علوووش